‘တ’ နဲ့ ‘တစ်’ ပြဿနာဟာ

ကိုမျိုးသန့်ဇင်က ‘တစ်ပါတည်း’ ကို ဘာကြောင့် ‘တ’ နဲ့ မရေးဘဲ ‘စသတ်’ ပါတဲ့ ‘တစ်’ နဲ့ ရေးရကြောင်း မေးပါတယ်။ အဲဒီအမေးအတွက် အခုစတေးတပ်ကို တင်ပါတယ်ခင်ဗျာ။
‘တ’ နဲ့ ‘တစ်’ ပြဿနာဟာ ပညာရှင်များ အကျေအလည် ဆွေးနွေးခဲ့ရတဲ့ ပြဿနာဖြစ်ပါတယ်ခင်ဗျ။ အဲဒီပြဿနာကို ကျွန်တော် လေ့လာမိတဲ့အတိုင်း ဖြေပါ့မယ်ခင်ဗျာ။ ဖြေတဲ့အခါ ၁၉၉၁ ခုနှစ် စက်တင်ဘာလမှာ ’မြန်မာစာအဖွဲ့’ က ထုတ်ဝေတဲ့ ‘မြန်မာအဘိဓာန်’ နဲ့ ၂၀၁၅ ခုနှစ် ဇန်နဝါရီလမှာ ‘မြန်မာစာအဖွဲ့’ က ထုတ်ဝေခဲ့တဲ့ ဆရာကြီး ‘မောင်ခင်မင် (ဓနုဖြူ)’ ရဲ့ ‘မြန်မာစာ မြန်မာစကားဝိုင်း’ စာအုပ်တို့ကို ကိုးကားပြီး ဖြေပါမယ်ခင်ဗျာ။

မြန်မာစာရေးသားရာမှာ ’တ’ နဲ့ ‘တစ်’ ကို ယေဘုယျကျတဲ့ ခွဲခြားနည်းရှိပါတယ်ခင်ဗျ။ အဲဒီခွဲခြားနည်းကို ဆရာကြီး မောင်ခင်မင် (ဓနုဖြူ) က -

“ယေဘုယျခွဲခြားသည့်မူတော့ ရှိပါသည်။ ‘တစ်၊ နှစ်’ စသည့် ကိန်းဂဏန်းအဓိပ္ပာယ်ဆိုလျှင် ‘တစ်’ ဟု ရေးပါ။ ‘တဝစား၊ တစောင်းအိပ်၊ တပျော်တပါးလာ၊ မိုးတဖြောက်ဖြောက်ရွာ’ စသည်ဖြင့် ကြိယာကို အထူးပြုသော ကြိယာဝိသေသနများမှ ‘တ’ တွေကိုတော့ စမသတ်ဘဲ ‘တ’ ဟု ရေးပါ”

လို့ ‘မြန်မာစာမြန်မာစကားဝိုင်း’ စာမျက်နှာ ၃၄ မှာ လမ်းညွှန်ထားပါတယ်ခင်ဗျာ။ ထို့အတူပဲ ‘မြန်မာအဘိဓာန်’ မှာလည်း အဲဒီအတိုင်း လမ်းညွှန်ထားပါတယ်ခင်ဗျာ။

အဲဒီလမ်းညွှန်ချက်အရ မြန်မာစာရေးသားရာမှာ ‘အရေအတွက် ကိန်းဂဏန်း သဘောဆောင်ရင် ‘တစ်’ လို့ ‘စသတ်’ နဲ့ ရေးရမှာဖြစ်ပြီး အရေအတွက် ကိန်းဂဏန်းသဘောမဆောင်ဘဲ ‘ကြိယာဝိသေသန’ သဘောဆောင်တဲ့ အသုံးတွေမှာ ‘တ’ ချည်းသက်သက်ရေးရမှာဖြစ်ကြောင်း ထင်ရှားပါပြီခင်ဗျ။

ပြီးတော့ -

‘တစ်ပါတည်း’ ကို မြန်မာအဘိဓာန်မှာ ‘အတူတကွ’ လို့ အနက်ဖွင့်ထားပါတယ်ခင်ဗျာ။

‘လူတစ်ဦးထွက်ခွာရာနေရာသို့ လူတစ်ဦး အတူတကွ လိုက်ပါတယ်’ လို့ပြောလိုတဲ့အခါ ‘တစ်ပါတည်း လိုက်သွားတယ်’ လို့ဆိုကြပါတယ်။ သွားတဲ့လူနဲ့ ‘တစ်ခါတည်း’ ‘တစ်ချိန်တည်း’ ’တစ်ကြိမ်တည်း’ လိုက်ပါသွားတယ်လို့ အနက်ကောက်လို့ရပါတယ်ခင်ဗျ။

အဲသလိုအနက်ကောက်လိုက်တဲ့အခါ ‘တစ်ပါတည်း’ ရဲ့အနက်ဟာ ‘အချိန်တစ်ခုတည်း’ ‘အချိန်တစ်ခါတည်း’ ‘အကြိမ်တစ်ခါတည်း’ ဆိုတဲ့အနက်မျိုးထွက်လာပါတယ်ခင်ဗျ။ ’တစ်ချိန်’ ‘နှစ်ချိန်’ ‘တစ်ကြိမ်’ ‘နှစ်ကြိမ်’ ဆိုတဲ့ ‘အရေအတွက် ကိန်းဂဏန်းသဘော’ ဆောင်နေကြောင်း တွေ့ရပါတယ်ခင်ဗျ။

ဒါကြောင့် အရေအတွက် ကိန်းဂဏန်းသဘောဆောင်နေ့တဲ့အတွက် ‘စသတ်’ ပါတဲ့ ’တစ်’ ကိုသုံးပြီး ‘တစ်ပါတည်း’ လို့ ရေးရခြင်း ဖြစ်ပါတယ်ခင်ဗျာ။